Берасьцейшчына руліць на «Tузін. Unplugged» (+відэа)

яшчэ фота

На задуму арганізатараў, у межах праекту «Tузін. Unplugged» ці тое «Жывы Тузін», паказваюцца самыя цікавыя і таленавітыя беларускія каманды ў нязвыклым для сябе фармаце. «Акустыка — самы цёплы фармат, калі музыкі могуць паказаць сябе і сваю творчасьць зь іншага гледзішча, а да ўсяго тут зьяўляецца вялікі момант імправізацыі», — распавёў на пачатку канцэрту Алег Хаменка і запрасіў на сцэну першых гасьцей.

Пачаўся канцэрт з выступу гурта «Спрат». Берасьцейская каманда выйшла на сцэну ўтрох, але інструмэнтаў падчас сэту скарыстала куды болей. Гітарыст часам браў у рукі скрыпку, а бубнач — гармонік. Пачалі зь песьні «На мяжы». Зайгралі ня толькі ўжо вядомыя гіты, такія як «Беларускае сэрца», «Адчуй» і кавэр на Neuro Dubel «У.Е.», але і некалькі новых песень. Адна зь іх («Стоп») прагучала па-за межамі рэпэтыцыяў упершыню. Публіка сустрэла музыкаў вельмі прыязна і падтрымлівала апладысмэнтамі падчас выкананьня кожнай песьні. Вакаліст Зьміцер Сянько надта расчуліўся такому прыёму. Лідэр «Спрату» прызнаўся, што сам для сябе адкрыў новы фармат — акустыку. У арыгінале гурт гучыць куды больш жорстка.

У перапынку Алег Хаменка нагадаў, што падчас выступу гуртам можна дасылаць пытаньні ў пісьмовай форме, а таксама разыграў торбачкі, складанкі ды іншыя сувэніры ад кампаніі «Будзьма беларусамі». Аўдыторыя была добраабазнаная ў музычных і гістарычных пытаньнях. Без праблем, напрыклад, адказалі, што на старабеларускай мове азначае слова «спрат» — схрон, скарб, і хто зруйнаваў родны горад гурта :B:N: у даўнія часы. Адказ быў, што Сувораў.

Гурт :B:N: пачаў свой выступ са старога гіта «Цягнік», які было даволі цяжка пазнаць па першых акордах акустычнай вэрсіі. Таксама хлопцы выканалі дзьве дастаткова новыя кампазыцыі («Крок за крокам» і «Праз туманы»), якія аматары :B:N: ужо чулі на папярэднім канцэрце. Часам Алесю Лютычу і ня трэба было сьпяваць — за яго гэта рабілі прыхільнікі, як у песьнях «Трываю» і «Сьпіралі». Вельмі нечаканай была інтэрпрэтацыя песьні «Жыве рок-н-рол!», падчас выкананьня якой музыкі не адзін раз зьмянялі тэмп і стыль выкананьня. Адзін з галоўных гітоў «Дажджамі» Алесь засьпяваў дуэтам зь дзяўчынай, якую пяшчотна прадставіў Ірыначкай.

У цэлым канцэрт атрымаўся выдатны, і Алесь прызнаўся, што хаця ў гэтым клюбе ён быў упершыню, пачуваўся на сцэне вельмі ўтульна, бо «атмасфэра была такая ж, як у маленькіх польскіх пабах з маленькімі сцэнкамі», дзе :B:N: неаднойчы выступалі.

На наступным канцэрце з сэрыі «Жывы Тузін» 13 лістапада выступяць гурты Da!Бл… і Neuro Dubel, які сыграе першы акустычны канцэрт у сваёй гісторыі.

Фотарэпартаж з імпрэзы

Тацяна Баранава, «Тузін Гітоў»
Мікалай Дубавіцкі, Budzma.org
Відэа: Яўген Шапчыц