Naka: рускі рок па-беларуску

Вакалістка гурта Наста Шпакоўская перакананая ў тым, што яны граюць рускі рок. «Мы пяем па-расейску, а таму звацца беларускім рокам неяк зусім няёмка, — кажа яна. — Да ўсяго паняцьце „рускі рок“ гэта яшчэ і вызначэньне жанру, пэўны стан душы. Таму не ўяўляю іншага найменьня ў дачыненьні да нас». Беларускую вэрсію сваёй песьні «Бяжы» Наста таксама вызначае, як «рускі рок», няхай сабе і па-беларуску: «Дух яе застаўся нязьменным. І менавіта дзеля яго захаваньня і была такая руплівая праца, бо зьмяняць дух сьпеву, не зьмяняючы пры гэтым яго зьмест — немагчыма», — упэўненая сьпявачка.

Беларускі тэкст «Бяжы» меў ажно тры рэдакцыі. Канчатковы варыянт прапанаваў літаратар Сяргей Балахонаў, якому сам трэк прыйшоўся да душы. «Як толькі зьявіўся добры і якасны пераклад, што атаясамліваўся са зьместам песьні, мы прыйшлі ў студыю і запісаліся», — тлумачыць Наста. Яна не шкадуе, што ўзяла ўдзел у праекце. «Беларуская мова для мяне цікавая сваёй рамантычнасьцю і пявучасьцю. Праўда непасрэдна ў песьні „Бяжы“ мне падалося, што мова тут загучала жорстка і прынцыпова, у адрозьненьні ад расейскай».

Наста кажа, што гурт Naka запіша яшчэ не адну песьню па-беларуску. «У мяне было і ёсьць імкненьне пісаць па-беларуску, няхай гэта і вымагае больш высілкаў. Мяркую, што ў нас зьявіцца яшчэ нямала такіх твораў».

Naka — Бяжы (музыка гурта, словы — Наста Шпакоўская, беларускі тэкст — Сяргей Балахонаў)
Песьня прадстаўляецца ў межах праекту «Тузін. Перазагрузка» парталаў music.fromby.net і www.budzma.org.

SB, ТГ