«Касіў Ясь» у фанку

Crimsonland — адзін з самых цікавых прадстаўнікоў гомельскай альтэрнатывы. Яны існуюць чатыры гады, але адразу знайшлі свой стыль, хоць лідэр каманды Сяргей Пяшко кажа, што яны наадварот — не абмяжоўваюцца межамі аднаго кірунку: «Увесь сэнс у спалучэньні, — кажа Сяргей. — Таму цікаўныя могуць угледзіць у нашай музыцы і фанк, і панк і пост-рок, і нават поп».

У Crimsonland стае ўласных песень, але яны абавязкова дадаюць у сваю канцэртную праграму некалькі кавэраў з Beatles, Led Zeppelin, AC/DC. Сьпяваюць пераважна па-ангельску, але вырашылі запісаць сваю інтэрпрэтацыю адной з самых вядомых беларускіх песень — «Касіў Ясь канюшыну» ў фанк-апрацоўцы. «Сам арыгінал у выкананьні „Песьняроў“ ужо гучыць пад фанк, а мы зафанкавалі „Яся“ яшчэ болей», — кажа лідэр гурта Сяргей Пяшко.

Цяпер гурт працуе над EP, плянуе запісаць яшчэ адну песьню па-беларуску. Музыкі абяцаюць, што гэта будзе не «Купалінка»:).

Гурт у сеціве — www.realmusic.ru/crimson

Crimsonland — Касіў Ясь канюшыну (музыка і словы народныя).
Зьмяшчаецца са згоды выканаўцы.

SB, ТГ