Пераможцы «Басовішча-2008» і ляўрэаты «Амбасовішча-2008» – гарадзенскі гурт Tlusta Lusta дэбютуе ў чарце ТГ і прэзэнтуе песьню «Сэрыялы». Лідэр гурта Кірыл Богуш кажа, што не ўстрымаўся ад напісаньня такой песьні: «Усе гэтыя бразыльскія, мэксыканскія ды амэрыканскія брацкія марысабэлі і сантыбарбары кранаюць сэнтымэнтальную душу беларуса».
Удзельнікі гурта Tlusta Lusta лічаць сваю перамогу на «Басовішчы-2008» фэерычнай. «Мы не чакалі такога посьпеху, таму зараз пакрысе прызвычайваемся да новага – „зорнага“ статусу», - кажуць гарадзенскія музыкі. Ужо ў верасьні яны плянуюць выдаць на БМА-group свой дэбютнік пад назвай «Blin рierszy». Гурт не зважае на аб’ектыўную нефарматнасьць сваёй музыкі і мае намер гуляць па ўсіх правілах шоў-бізу: «У падтрымку выхаду нашага дыску мы абавязкова здымем відэа, і пэўна не адно».Адна з тых песень, якая, са словаў музыкаў з Tlusta Lusta, мае быць «запатрабаванай у шырокіх колах насельніцтва краіны» – «Сэрыялы». Лідэр гурта Кірыл Богуш кажа: «Песьня „Сэрыялы“ – гэта стандартны блюзавы матыў і актуальная тэматыка. Мы пэўныя, што ўсе гэтыя бразыльскія, мэксыканскія ды амэрыканскія брацкія марысабэлі і сантыбарбары кранаюць сэнтымэнтальную душу беларуса, таму песьня мусіць мець посьпех. Як паказвае практыка, у сэзон збору ўраджаю трохі сьлёзаў і сэнтымэнтальны настрой падымае паказьнікі да недасягальных вышыняў».
Tlusta Lusta – Сэрыялы (музыка і словы гурта).
Разьмяшчаецца са згоды выканаўцы.
SB, ТГ
